Þau gleðitíðindi bárust okkur rétt fyrir skólalok að Kársnesskóli hefði hlotið styrk úr sjóðnum Forritarar framtíðarinnar en sjóðurinn vill stuðla að aukinni fræðslu og áhuga meðal barna og unglinga á forritun og tækni. Í ár styrkir sjóðurinn 18 skóla um sem nemur 5 milljónum króna.
Styrkir skiptast í tvo meginflokka, annars vegar er úthlutað um 1,9 milljónum króna vegna námskeiða sem kennarar geta sótt til að efla sig í forritunarkennslu og hins vegar er úthlutað um 3,4 milljónum króna til kaupa á smátækjum í forritunar- og tæknikennslu ásamt úthlutun á notuðum tölvubúnaði sem hollvinir FF gefa sjóðnum árlega.
Kársnesskóli hlaut styrk til kaupa á minni tækjum í forritunar- og tæknikennslu að upphæð kr. 250.000 krónur og þarf ekki að taka fram að slíkur styrkur kemur sér afar vel.
Kennarar í Kársnesskóla hafa stigið stór skref undanfarið varðandi rafræna kennsluhætti og er áhugi á að efla slíkt námsumhverfi enn frekar, því er ljóst að styrkurinn mun koma að afar góðum notum fyrir starfsfólk og nemendur Kársnesskóla.
